Bîst û Yek Sal û Çar Meh

Em tim di bin zulmê de bûn. Emrê me li ber deriyên girtîgeha xelas bû. Sê zarokên min kuştin. Kurê min di pirtûka xwe de hindik gotiye. Gelek tişt negotine hê. Divê her Kurdek hay ji xwe hebe û bibîne bê çi anîn serê me. Yên ku ev sosret bi serê me de anîn ji Xwedayê xwe bibînin...
Zeynep Poyraz (Dayika Alî Poyraz) 

Hestên di nava dîwar û hesinan de, hestên hevaltiya dilsoz, hestên paqij, hestên berxwedanê, hestên baweriyê û hestên hêviyê, hestên xeyalên paşerojê û hestên ku di eniya xwe de dîrok nivîsandine....
Siyasetmedar Kemal Aktaş

Alî Poyraz yekî ji me ye, can û cîgera me ye. Lê wî tim xwest li rengên keskesorê temaşe bike. Ji ber wê jî xem nekir ku li ber baranê şil bibe. Lê ne şilbûneke wisa bû ya Alî. Li zindanan rojên bi eskince û bi xwîn nîşanî Alî dan wekî Xellacê Mensûr. Ji derekê sirgûnî dereke din kirin. Jê re gotin "Sirgûn bêyî mirin nabe". Mirinên ecêb dît. Gelo yên ku vana nîşanî Alî dan tiştek bi dest xistin? Ne pêkan e. Alî hê jî li ber baranan şil dibe û li bin keskesoran direqise. Tu her bijî hevalê Alî. Em ê bi arava te û hevalên wekî te fêrî xweşikahiyên keskesoran bibin.
Azîz Tunç